"اخسر وزنك تكسب صحتك"..

يا ترى نفسك تخسي..!! ومش عارفة تبدأي ازاي؟...!! أو مترددة وقلقانة تروحي لدكتور يحرمك من "الشيكولاتة" و"البيتزا" و"الشيبسي" و"البيبسي" وكل اللي نفسك فيه..!! وزنك زاد ومش عارفة تلبسي حاجة تناسب سنك..!! بتنهجي وانت ماشية أو لما تطلعي سلم..!! يا ترى جربتي أكتر من ريجيم والحكاية برضه مش نافعة..! يا ترى بعد عذاب الريجيم والحرمان رجعت "ريمة لعادتها القديمة" واللي خسيتيه في شهور رجعتيه وأكتر في أسبوعين..!!


المهم في الريجيم البحث عن حافز لإنقاص الوزن لكن لو بدأنا الريجيم في رمضان وبدأنا نشعر إننا مش قادرين نكمل وخايفين جدا نضيع تعب الشهور اللي فاتت وخاصة لو كنا بدأنا ريجيم قبل رمضان وخسرنا عدد كبير من الكيلو جرامات... وقررنا نأجّل الريجيم لبعد رمضان والعيد لكن في نفس الوقت مش عايزين نتخن ومش عارفين نعمل ريجيم!!..
يا ترى نعمل إيه!!..
باقول لكل واحد مش قادر يخس أو مش عاوز يخس ممكن نثبت الوزن وأعتقد إنه الشيء المنطقي في رمضان وخاصة إن البعض بيشعر إنه من الصعب أن يلزم نفسه بشيء في الصيام...

وعشان نحافظ على وزننا ناكل على قد ما الجسم بيحرق سعرات حرارية... يعني لو بنت هتكون محتاجة إلى 1800 سعر حراري ولو ولد هيكون محتاج إلى 2200 سعر نقسم السعرات على مجموع الأكل اللي بناكله طول اليوم يعني لو حبينا ناكل قطايف لازم نبقى عارفين إن واحدة من القطايف الصغيرة تحتوي على 300 سعر حراري.. وبما إننا لا نعرف عدد سعرات الحرارية لأغلب الأكل ففيه طريقة أسهل...

وهي إني أحرص على الوزن كل أسبوع عشان أعرف وزني قد إيه وآكل عادي بس نصف الكمية اللي أنا متعود عليها يعني لو متعود آكل طبق أرز أكتفي بنص الطبق.. كل الأكل مسموح به بس نص الكمية والحلو يوم قطايف وأكتفي بواحدة وأكمل الحلو بالفاكهة تفاحة كمثرى أو يوم قطايف أو أي حاجة حلوة واليوم التاني يبقى الحلو فاكهة مع الحفاظ على أن يكون بين كل وجبة والتانية مش أقل من خمس ساعات مع الانتظام في ممارسة الرياضة.. وفي نهاية الأسبوع أوزن نفسي لقيت الوزن زايد معناه إني تجاوزت السعرات الحرارية المقررة في اليوم وأبدأ أقلل في الكمية وأزود في الفاكهة شوية بدل الحلويات وأمارس رياضة أكتر.
لو كان الوزن أقل؟؟؟
في الحالة دي أزود من الحلويات شوية أو أزوّد في كمية الوجبة والميزان دائما هو ما يوجهني إلى تقليل أو زيادة الأكل.
نصايح مهمة على الفطار تساعد في تثبيت الوزن؟
مهم نعرف مكونات الأكل اللي نتناوله عشان نقدر نحدد مدى تأثيره علينا ونبدأ بالشوربة:
الشوربة طبق رئيسي على الفطار وعشان نشربها وإحنا بنثبت الوزن ممكن نشرب شوربة الفراخ بعد وضعها في التلاجة ونشيل الوش أو طبقة الدسم أو نشرب شوربة طماطم أو شوربة خضار بعض الناس في الحر ممكن يستغنوا عن الشوربة.

التمر: من أساسيات الإفطار والبعض بيتناوله لأنه سنة وطبعا ولا شك إنه يحتوي على قيمة غذائية كبيرة ولكنه يحتوي على سعرات حرارية عالية جدا جدا.... في الريجيم العادي غير مسموح به أبدا وهو من الفاكهة الممنوعة لكن في التثبيت أو في الريجيم الخفيف هو مسموح لكن بكمية قليلة جدًّا يعني تكفي واحدة أو اثنين بالكتير... يبقى أنا كده عملت السنة بدون إسراف أو تفريط.

من الحاجات المهمة شرب المية وخاصة البنات والستات؛ لأنهم بينسوا المية خالص، والمية مهمة قبل الأكل وسط الأكل ومابتعملش كرش أبدا.
إزاي نتعامل مع الفطار صح؟
أولا ناكل تمرة أو نشرب الشوربة ونصلي المغرب خلال ربع ساعة تكون المعدة اشتغلت بعد كده نبدأ في وجبتنا الرئيسية ويكون فيها كل حاجة نشويات أربع ملاعق أرز أو مكرونة أو عيش بلدي وطبعا أفضل لو استخدمنا الأرز البني والبسمتي والمكرونة السن ويكون على الفطار طبق خضار ني في ني وعلى الفكرة أغلب الناس النهارده بيحبوه.. ممكن سمنة أو زيت لكن كمية قليلة جدًّا... والبروتين ربع فرخة منزوعة الجلد أو قطعة لحمة مشوية أو على حسب الرغبة.

وطبعا السلطة والفاكهة نهتم بهم جدًّا؛ لأنهم بيساعدوا على انتظام الجهاز الهضمي اللي بيضطرب في رمضان بسبب اختلاف مواعيد الأكل.

بعد التراويح ناخد قطايف أو فاكهة.

وفي السحور زبادي أو فول أو جبنة قليلة الدسم أو جبنة قريش بكميات قليلة ونقلل الملح... ونقلل المخللات ونكتفي به على الفطار حاجة بسيطة لو الضغط منخفض؛ لأن الحر والصيام بيخفضوا الضغط.
هل فيه عصاير ممنوعة؟
ممكن نشرب عصير مانجو لكن بكمية قليلة ويكون أفضل لو كان عصير برتقال سعراته الحرارية أقل... كمان من العصاير المفيدة في رمضان العرقسوس والكركديه وممكن نحليه بالدايت سويت أو بالكندريل أو أي بديل للسكر عشان أشرب براحتي أي كمية من العصير.
والقمر الدين والخشاف!!..
أنا ضد فكرة المنع لو أنا مش عامل ريجيم كلنا متربيين على الخشاف والقمر الدين... ودي من الحاجات الجميلة المتربطة برمضان من زمان وكل البيوت المصرية لا تخلو موائدها من الخشاف لكن أهلنا كانوا بيتحركوا أكتر مننا النهارده إحنا عايشين في زمن الريموت كنترول ونادرا ما نتحرك ممكن ناخد قمر الدين والخشاف لكن بكميه قليلة جدًّا؛ لأن سعراتهم عالية جدًّا.
في السعودية بيتعاملوا مع الفطار بشكل مختلف بعد المغرب تمر وحاجة خفيفة والوجبة الرئيسية بعد صلاة التراويح... هل النظام ده يساهم في تثنيت الوزن ممكن نطبَّقه؟
لما بنسافر للعمرة التمر بعد المغرب بيدينا طاقة كبيرة عشان نصلي لمدة طويلة وبنشاط وبدون أن نشعر بالجوع أو العطش وفي الثانية عشرة بعد صلاة القيام نأكل الوجبة الرئيسية بالإضافة إلى المجهود الذي نبذله في الصلاة وفعلا وزننا بيقل كتير... وممكن نطبق نفس الأسلوب هنا لا مانع وممكن يساعدنا في التثبيت... لكن لا تكون الوجبة الرئيسية قبل صلاة الفجر أو قبل النوم مباشرة.