أين أنت ؟؟؟؟!!!!!!

إنت فين ؟
ممكن أعرف إنت فين ؟؟

بالله عليك رد عليّ .. ولا أقولك مش لازم ترد عليّ .. رد علي نفسك بينك وبينها كده بصدق

إنت فين من كل ده ؟؟

إنت فين من دينك ؟؟ عملت إيه ينفعك يوم لا ينفع مال ولا بنون إلا من أتي الله بقلب سليم .. يوم يفر المرء من أخيه وأمه وأبيه .. يوم يجعل الولدان شيباً .. إنت فين بالله عليك

إنت فين من الموت .. أعز حبايبك بيموت أمام عينيك والله .. ولا تملك أي شئ ممكن تقدمه له .. فقط عمله الصالح هو اللي هيحدد مصيره .. ومصير الملائكة من حوله .. إما ملائكة رحمة .. وإما ملائكة عذاب .. عملت إيه بعد ما شوفت وعرفت المواقف الرهيبة ديه .. عملت إيه ؟؟ مش تنسي إن أنا وإنت وهو وهي وكلهم وكلنا هنموت هنموت .. لا محالة .. لا مفر .. ولو كنتم في بروج مشيدة .. بينك وبين نفسك .. قولها علي عمل ولو واحد بس عملته بعد ما شوفت وسمعت هول المواقف ديه .. وإسألها لسة مستمرة ولا كان عمل لحظي فقط ؟؟ وشوف هتقولك إيه .. بس خليك صادق معاها ده بينك وبينها

إنت فين مما نحن فيه الآن ؟؟ الرسول صلي الله عليه وسلم يُهان .. تقدر تقولي عملت إيه ؟؟ أو قول لنفسك بينك وبينها في لحظة صدق .. عملت إيه علشان أنصر رسولي وحبيبي .. وهو أيضاً شفيعي يوم القيامة .. ياتري هيشفع لنا ؟؟ ولا هيبعد عننا ؟؟ الكفرة يعلنوا إسلامهم في المواقف ديه .. وإحنا راميين القضية مش قضيتنا .. قول لنفسك علي حتي لو عمل واحد بس إيجابي عملته لنصرة حبيبك وشفيعك بعد ما سمعت ما سمعت ورأيت ما رأيت .. وياتري هتستمر عليه ولا برضه حاجة لحظية

والله حتي الله تبارك وتعالي ما سلم من قيل قال .. الله عز شأنه وتبارك إسمه .. ما سلم منهم .. وحسبنا الله ونعم الوكيل .. وماذا فعلنا ؟؟ لست أدري ماذا فعلنا .. كيف سنقابل الله تعالي وماذا نقول له .. لست أدري

ولا حول ولا قوة إلا بالله العلي العظيم
يا إخواني .. بالله عليكم تفكروا .. تفكروا .. إجعلوا لأنفسكم ولو القليل القليل من الدقائق .. تصدقون فيها مع أنفسكم .. إصدقوا الله وأنفسكم ولو لدقيقة واحدة .. والله هتفرق معانا كتير .. وربما يتغير مسار عمرنا المتبقي كله 180 درجة والله .. فعليّ وعليكم بالإخلاص في القول والفعل والعمل والصدق مع الله ومع أنفسنا .. وتجنب العمل وإشراك فيه غير الله بالرياء .. فعلينا بالعمل لوجه الله تعالي فقط .. فقط إبتغاء مرضاه الله .. لا تشرك الناس في عملك .. فلم ولن ينفعوك بشئ .. أقسم بالله لم ولن ينفعوك بشئ .. بل إنهم ربما يضروك .. وهذا في غالب الأحيان

من رأى منكم منكرا فليغيره بيده فإن لم يستطع فليغيره بلسانه فإن لم يستطع فليغيره بقلبه وذلك أضعف الإيمان
الراوي: - - خلاصة الدرجة: صحيح - المحدث: ابن العربي - المصدر: أحكام القرآن - الصفحة أو الرقم: 2/227

طيب لو حتي مش في إيدك تعمل حاجة .. إعمل حاجة واحدة بس .. غير من نفسك .. وأصلحها .. وهذبها .. وجاهدها في الله حق جهاده .. إصلح نفسك

والله رسالة أوجهها لنفسي

أكتر من كده رسالة إيه محتاجة .. ده الدنيا حقيرة ومش محتاجة .. والله انا في حاجة .. إني أعمل حاجة .. إعملي حاجة .. أي حاجة .. بس إعملي حاجة

إجعل لك في يومك شئ أساسي مهما كان عملك .. نظم وقتك بحيث يكون لك أساسيات تقوم بها تجاه دينك مهما كانت الظروف .. إعتبرها شئ أساسي لا يمكن أن يمر اليوم بدونها .. ولو مر اليوم بدونها .. إعتبر إنك خسرت خسارة شديدة جداً في عملك .. ومش هتقدر تعوض اللحظة ديه تاني

والله ياما علماء في جميع المجالات تراهم لا يغفلون عن دينهم لحظة .. بل العكس .. تمسكهم بدينهم وعمل الخيرات هو الذي يصل بهم لمثل هذه الدرجات والمراتب العليا

بعض الأشياء التي يمكن عملها وهي من أيسر الأمور إن شاء الله تعالي

1- عمل ورد يومي من القرآن الكريم .. ولو جزء بسيط .. لا يمر اليوم بدونه .. إجعلها في ذهنك .. لا يمكن أن يمر اليوم بدونه
بلاش تكون ممن قال الله تعالي فيهم .. ويقول الرسول ياربِ إن قومي إتخذوا هذا القرآن مهجوراً

من قرأ حرفا من كتاب الله فله به حسنة ، والحسنة بعشر أمثالها ، لا أقول { ألم } حرف ، ولكن ألف حرف ، ولام حرف ، وميم حرف
الراوي: عبدالله بن مسعود - خلاصة الدرجة: صحيح - المحدث: الألباني - المصدر: صحيح الترغيب - الصفحة أو الرقم: 1416

[center]وطبعاً ربنا كريم وبيضاعف لمن يشاء .. ربنا يجعلنا منهم .. اللهم آمين

وياريتك لو تتعلم القراءة الصحيحة وتعلمها لحد .. فخيركم من تعلم القرآن وعلمه .. وشجع كل من حولك .. اسألهم قرأتوا النهارده الورد ولا لأ المخصص لكم

2- ذكر الله تعالي كثيراً .. وهو يسير جداً جداً جداً .. وأنت تفعل أي شئ يمكنك ذكر الله .. وأنت في تسير في طريق سواء كنت ماشياً أو راكباً .. وأنت في لحظة فراغ أو راحة وإسترخاء ردد ولو ذكر واحد ولو مرة واحدة وهذا أضعف شئ .. وأنت في أي مجلس مهما كان أهميته .. ردد ذكر ولو بسيط جهراً .. وذكر الناس بالله تعالي ولو بذكر بسيط جداً علناً .. فلتقل لهم مثلاً .. صلوا علي رسول الله صلي الله عليه وسلم .. سيصلون عليه ويكون بميزان حسناتك إن صدقت النية إن شاء الله .. كأن تقول .. إذكروا الله عباد الله .. لا حول ولا قوة إلا بالله .. كنز من كنوز الجنة .. سبحان الله وبحمده سبحان الله العظيم .. لك بها نخلة في الجنة .. وكمان الأذكار بعد الصلاة .. سبحان الله 33 مرة .. والحمد لله 33 مرة .. والله أكبر 34 مرة .. وحاول مش تقوم من مكان صلاتك غير لما تقولهم .. لأن في الغالب لو قمت بتلاقي حد يتكلم معاك أو تنشغل بحاجة .. هي كلها دقيقة إن شاء الله في سبيل الله .. مقابلها بركة في الوقت .. وسعة في الرزق بإذن الله .. وأنت نائم قبل النوم ردد أذكار حتي تنام

اه علي فكرة .. نسيت أقولك .. الرسول عليه الصلاة والسلام المعصوم عن الخطأ .. الذي غفر الله تعالي له ما تقدم وما تأخر من ذنب .. كان يستغفر الله في اليوم والليلة أكثر من سبعين مرة .. وفي رواية 100 مرة .. إحنا بقا .. الله المستعان

علي فكرة .. ممكن تجيب سبحة صغيرة تضعها في جيبك أو في الشنطة .. وتسبح عليها .. هتقولي إنها بدعة .. هقولك فيها إختلاف بين العلماء .. ولو قلقان منها .. خليها معاك بس تذكرك بالذكر وسبح علي ايدك زي ما تحب .. وإستخدام السبحة إن شاء الله مش فيه حرج .. سبحان الله ساعات تري رؤية لحد متوفي وهو خارج من الصلاة وماسك سبحة يسبح عيها .. المهم اعمل اللي يريحك .. المهم توصل للهدف

3- طبعاً الحمد لله كلنا مداومين علي الصلاة .. لأن الصلاة هي اللي بتفرق بين المسلم والكافر يوم القيامة .. وبإجماع العلماء أن تارك الصلاة يعتبر كافر والعياذ بالله .. حاول بقدر الإمكان تصلي النوافل والسنن الرواتب .. علي قدر ما تطيق .. لا يكلف الله نفساً إلا وسعها .. ومش تنسي .. من صلي لله في اليوم اثنتي عشر ركعة .. بني الله قصراً في الجنة .. وهما .. ركعتان قبل الفجر .. واثنتان قبل الظهر واربعة بعده مش تفرق .. ويا سلام لو اربعة قبل واربعة بعد الظهر .. يحرم الله عليك النار .. وركعتان بعد المغرب .. واثنتان بعد العشاء .

ومش هنقول إنك لازم تداوم عليهم كلهم مرة واحدة .. لا يا أخي .. لو كان بمقدرتك يبقا خير جداً .. لكن .. لا يكلف الله نفساً إلا وسعها .. حال تنتظم علي سنن فريضة أو فريضتين .. لغاية ما تلاقي نفسك الحمد لله مش ممكن تصلي الفريضة من غير السنة وبعدين كمل بقية السنن .. ولو كان العرض بصراحة مغري يخلي الواحد يصليهم كلهم من اول يوم .. بس مش تكلف نفسك أكتر من طاقتك علشان مش تنقلب مرة واحدة للضد .. إعطي نفسك فرصة .. وعلي فكرة كمان .. من باب التيسير في صلاة النوافل والسنن .. مش لازم تصلي بالسورة الصغيرة بعد الفاتحة .. يعني ممكن تصلي بالفاتحة بس .. وقد قمت بالسؤال من قبل في هذا الموضوع في موقع الإسلام سؤال وجواب وكان الرد زي ما ذكرت لك .. وبرضه هدور علي الفتوي وهبعتها لكم إن شاء الله .. يلا بقا .. أكتر من كده تيسير إيه ؟؟ يلا بقا خذ خطوة

وطبعاً في مكان عملك أياَ كان فين .. تقدر تروح تصلي .. وتقدر تأخذ زمايلك معاك وتصلوا جماعة .. ويكونوا كلهم في ميزان حسناتك .. وتكونوا كسبتوا ثواب الجماعة إن شاء الله .. فهي أفضل من الفرد بـ 27 مرة وفي رواية 25 مرة .. وكله في ميزان حسناتك إن شاء الله

4- مكالمة واحدة فقط تليفونية صلة رحم .. ولو مش موجود في البيت طول النهار .. اعملها م موبايلك .. مش تفرق معاك الدقيقة ديه او حتي الدقيقتين .. ربنا هيعوضك خيراً منها والله إن شاء الله .. كفاية السعادة اللي هتدخلها علي اللي هتكلمه .. والله كفاية انك هتحس بساعدة إنك دخلت سرور علي مسلم .. وربنا هيدخل عليك سرور من حيث لا تحتسب والله

5- لو كنت قاعد علي النت .. ابعت ولو ميل واحد بس لناس كتير وقولهم ينشروه .. انشر دينك .. وانصر المسلمين .. والرسول عليه الصلاة والسلام .. والله هيكون في ميزان حسناتك إن شاء الله .. إعمل اي عمل ولو بسيط جداً .. أي حاجة اي رسالة حتي لو علي المسنجر .. أظن مش هتكلفك حاجة .. بس هتكون في ميزان حسناتك

ومش تنسي قول الرسول صلي الله عليه وسلم
لإن يهدي الله بك رجلاً واحداً خير لك من حمر النعم

ومش تعرف مين ربنا هيجعل هدايته علي ايدك حتي لو مش تعرف .. بس تعرف يوم القيامة إن شاء الله لما تتلقي كتابك وتلاقيه إن شاء الله مليئ بالحسنات

لو كنت مشترك في مجموعة بريدية .. أو منتدي .. أو أي موقع .. أبعت لهم ولو رسالة واحدة .. ذكر الناس بربنا .. لو مش مشترك ابعت لصحابك .. الصالح منهم والعاصي .. ابعتلهم وذكرهم بربنا وبالموت والقبر والحساب والجنة والنار .. لو بتستخدم المسنجر ابعت للمتضافين عندك .. والله حتي لو واحد بس .. الرسائل بتمر .. سبحان الله تبعت رسالة تلاقيها عمالة تلف علي النت كله من الشرق للغرب وكله .. مش تتكسف من إنك تبعت رسالة .. في ناس بتككسف والله من كده .. وتقول إزاي ابعت رسالة والناس تشوف إسمي كده اني ببعت رسائل .. هو انا فاضي للكلام ده ؟؟ الناس تقول ايه ؟؟ والله انا هقولك .. الناس ديه أول حد هيتخلي عنك .. وعلي فكرة مش في الآخرة بس .. لا والله .. هيتخلوا عنك دنيا وآخرة .. بتمر ساعات بظروف قاسية .. وتدور علي الناس ديه .. مش تلاقي .. بالعكس تلاقيهم بيعملوا لك مشاكل في عز انت مش ناقص .. والله العظيم هي ديه الحقيقة .. ومش تعرف .. يمكن هما كمان يغيروا تفكيرم ويقلدوك ويكون كله يارب في ميزان حسناتك إن شاء الله

6- تبسمك في وجه أخيك صدقة
يااااااااااااه .. سبحان الله .. شوف ربنا رحيم وبيحبنا إزاي .. يعني مجرد إني أضحك أو أبتسم في وجه أخي مع صدق النية .. يبقا صدقة ؟؟ يبقا في ميزان حسناتي ؟؟ اه والله شوفت بقا ربنا كبير إزاي .. وبيحبنا إزاي .. وبيحب لنا الخير إزاي .. مهما كان في داخلك من هم أو حزن .. الناس مش ليها ذنب .. قول الحمد لله علي كل حال .. ومش تبين لهم إنك في مشكلة أو ضيق .. تبسم في وجوههم .. ولعل الله أن يفرج كربك وهمك بمجرد تبسمك هذا

7- لو كنت في أي مجلس أو حتي مكالمة تليفونية .. وسمعت حد بيتكلم عن حد بالغيبة والنميمة .. فذكره بالله تعالي .. وذكره بأن يستغفر لنفس ولمن أخطأ في حقه .. وحاول قبل ما تنهي أي كلام مع أي حد تقول دعاء كفارة المجلس .. حتي لو كان مجلس ذكر مش مشكلة ردده وفي ميزان حسنات إن شاء الله

سبحانك اللهم وبحمدك .. أشهد أن لا إله إلا أنت .. أستغفرك وأتوب إليك

في بقا حاجة ظريفة جداً هتعجبكم كلكم إن شاء الله .. طبعاً كلنا بندعي لنفسنا .. يعني أنا مثلاً بدعي لنفسي بحاجة أتمناها .. إيه رأيك بقا لو لما تدعي لنفسك تقول كلمتين كمان بس مش هترقك في حاجة .. قول .. ولجميع المسلمين والمسلمات الأحياء منهم والأموات .. أو قول .. ليّ ولجميع المسلمين .. ما شاء الله عليك .. بكل مسلم ومسلمة حسنة .. رحمة الله علينا جميعاً والمسلمين أجمعين أحياءاً وأموات

[size=16]هقولك بقا علي حاجة أخيرة .. يمكن مش كل الناس تقدر تعملها .. ولو كنا كلنا نقدر نعملها

ممكن تشوف حد من جيرانك أو حتي أقربائك أو حد يكون يتميم أو أي حد يكون محتاج .. وحاول تزوره ولو مرة في الشهر .. وحاول لو قدرت تدبر له مبلغ ولو يسير جداً من مصروفك أو مرتبك أو تجمع إنت وصحابك وأقربائك .. وتجيب له حاجات ولو بسيطة جداً .. إحتياجات أساسية في ظل ما يعاني منه العالم من الغلاء الرهيب .. حاول بقدر الإمكان .. والله لو تركت جنيه واحد بس من مصروفك أو مرتبك وجمع إنت وكل من حولك وساعد الناس المحتاجة علي قد ما تقدر .. ومش تقلق .. الرسول عليه الصلاة والسلام بلغنا .. ما نقص مال من صدقة .. وبلغنا .. أنا وكافل اليتيم كهاتين في الجنة وأشار بإصبعيه السبابة والوسطي

وحاول بقدر الإمكان مع اليتيم .. حتي لو تمسح علي رأسه .. كما وصانا الرسول صلي الله عليه وسلم .. فإنت مش تعرف هو جواه إيه

والله في مرة سمعت أحد الشيوخ مش فاكرة مين بالتحديد .. يتحدث عن التجارة مع الله .. فيقول .. إتصلت بي إحدي الأخوات وقالت لي .. كنت أريد مبلغ 100 جنيه لأمر ضروري جداً .. ولا يتوفر عندي أي نقود إطلاقاً .. فقمت وجمعت من البيت بعض الكميات القليلة من الأشياء المتوفرة لدي .. مثل الأرز والمكرونة وما شابه ذلك .. جمعت منهم كميات تقدر بمبلغ 10 جنيهات 00 وقمت وتصدقت بهم .. وتقول .. والله الذي لا إلا إلا هو .. ما مر عليّ الليل إلا وقد توفر لدي المبلغ الذي أحتاج إليه 100 جنيه .. وهذه هي التجارة مع الله بصدق النيه .. لعل البعض يتسائل ؟؟ إشمعني يعني جت لها 100 جنيه بالظبط ؟؟ أقولك لإنها حسبتها صح .. الحسنة بعشر أمثالها .. فالحمد لله .. 10 جنيه تجيب لها 100 جنيه .. ويبقي إسمها عملت عمل خير ويسر لها أمورها

تعرف تكون كده .. وبتفكر كده .. وبتعمل كده .. وبتصدق مع الله كده

كل ما ذكرته أوجهه لنفسي أولاً قبل أي شئ ثم أوجهه لكم وللمسلمين كافة

يعلم الله كم أتمني من الخير لي ولكم وللمسلمين كافة .. ويعلم الله كم ترددت كثيراً في كتابة هذه المقالة وإرسالها لكم .. وعلي فكرة مش لازم كل حاجة تتعمل في وقت واحد .. إعمل حاجة حاجة .. هتلاقي نفسك مش محتاج لأي حاجة تذكرك .. لأن هيكون شغلك الشاغل إن شاء الله هو ربنا وإرضائه .. وتلاقي نفسك انت بتبتكر حاجات تجمع بيها حسنات وتمل با ميزان حسنات إن شاء الله .. وإن شاء الله نلاقيك بتكتب لنا حاجة من نفسك تذكرنا بيها بدل غفلة الدنيا هذه .. وفقنا الله جميعاً لما فيه الخير .. ورزقنا صراطه المستقيم

أتمني من الله العلي القدير أن يوفقني ويوفقكم وكل المسلمين لفعل الخيرات

وأسألكم الدعاء لي بظهر الغيب بالهداية والصلاح وحسن الخاتمة ولنا ولجميع المسلمين بالرحمة والغفران .. وجمعنا الله تعالي في الفردوس الأعلي مع حبيبنا وشفيعنا وكل من يعز علينا دون حساب ولا سابقة عذاب ولا عتاب .. اللهم آمين

أعتذر عن الإطالة الشديدة .. نفعنا الله تعالي وإياكم بها .. وأتمني نشرها في كل مكان

أعوذ بالله أن أكون جسراً تعبرون به إلي الجنة ويسقط هو في النار
ثم أعوذ الله أن أثذكركم به وأنساه

سبحانك اللهم وبحمدك .. أشهد أن لا إله إلا أنت .. أستغفرك وأتوب إليك
وسلام الله عليكم ورحمته وبركاته

اللهم انك سلطت علينا عدوا عليما بعيوبنا - يرانا هو وقبيله من حيث لا نراهم -- اللهم آيسه منا كما آيستـه من رحمتك وقنطه منا كما قنطـته من عـفوك -- وباعــد بيننا وبينه كما باعـدت بينه وبين رحمتك وجنتك